Thursday, July 18, 2013

Astro 180 I-Dusun/Kadazan

Isai dokoyou oubas mintong do borita I-Dusun toi I-Kadazan id Astro 180? Kosolimbau itu tikid tadau doid timpu 7.00 gisom 7.15 totuong.

Nu it opurimanan ku, osonong kopio porinta tu minanak do kosiwatan boros tinaru dotokou kosolimbau di Astro kosolimbahan 180. Iti iso waya do kaanu oh boros tinaru tulun Dusun om Tanggara do kosolimbau diod TV. Asanangan toomod oku mintong diti kosolimbahan tu sumonu korongou oku do boros do Dusun toi Tanggara di amu insan orrongou om hilo nodi muhot di komolohingan.

Kumaa di komulakan, umbalan daa dokoyou do mintong diti kosolimbahan tu amu ie alaid iri, 15 minit noh om opupusan. Kada tokou nogi gobulan do minsingilo om muhot nung korongou tokou di boros do tanggalarom rati toi ie amu insan norongou.

Thursday, March 22, 2012

Kolej KadazanDusun Murut

Osonong toomod oh angkab do luguan tokou do popoturidong do Kolej KadazanDusun Murut id Tambunan. Oponsol kopio ti kolej montok tokou tulun KadazanDusun om Murut lolobi poh di komulakan do baino.
Kopoturidangan do kolej diti doid Tambunan kaanu nogi do popoburu kinoiyonon posoriri do Tambunan om opurimanan ku ososnong tomod iti.
Om alansan oku nogi do kosuni kaagu oh boros tinaru do KadazanDusun om Murut om ingaa nodii oh kaantob do komulakan do KadazanDusun om Murut do amu koilo do boros tinaru sondiri.

Wednesday, October 19, 2011

Poguluonon Poh Minsingilo Boros Tokou

Poposogu oku kumaa daa di haro tanganak tongkoro do monuduk daa di tanganak di do boros tokou sondiri pogulu koi monuduk diolo do boros do suai miagal toi boros Malayu om English.
Pinoboros di Dr. Felix Tongkul (toput boros di vice chancellor UMS Proffesor Datuk Seri Panglima Dr. Kamaruzaman Haji Ampon).
Kad sio, tanganak di notudukan moboros do boros molohing diolo lobi asanang do minsingilo do boros do suai soira kagayo. Iti nopo nga okon di Sabah no nga pototongkop do pomogunan.
Jadi mantad baino, tudukan om barasan noh tanganak tokou do Dusun om amu noh atagak iti boros tokou.

Wednesday, May 4, 2011

Boros Dusun - Kakamot di Walai

Nung moboros tokou kokomoi do walai, osorou tokou pandatan, suang walai, dompuran om puyut. Id iso-iso tionon iti haro oh kakamot it asarau tokou tokito om gunawon. Nga asasaru roiton tokou doti in bahasa Melayu. Baino, mingsingilo tokou nunu ngaie ie kakamot diri (it osorou kuno ti, haro nopo toilaan dokoyu nga posunudon non). Iti nopo ti nga nunu kaka ie kiharo id walai di gulu-gulu hi.

a. Pandatan (Kaki Lima)
1. Tukad (tangga)
2. Tirikohonon (bangku)
3. Rampaian (tempat jemuran kain)

b. Suang Walai om Todopon (Dalam rumah dan bilik tidur)
1. Galam (tikar)
2. Kumut/Kobog (selimut)
3. Tulunan (bantal)
4. Garung/Rasuk/Bangkad (baju)
5. Pogotulan (cermin)

c. Dompuran (Dapur)
1. Suduon (kayu api)
2. dompuran (tempat memasak)
3. Pais (pisau)
4. Lanjang
5. Balanga
6. Tusi (garam)
7. pongomis (gula)
8. Tompurung (piring)
9. Sangkir (cawan - ada telinga untuk dipegang)
10. Suki (cawan - tiada telinga, biasa dibuat dari bambu)
11. Sikang (senduk)
12. Pahandatan (dulang)
13. Kakanan (tajau)
14. Dangol (parang)
15. Poniri
16. Tipang (tajau tempat menyimpan air)

d. Puyut (Bawah Kolong)
1. Wakid
2. Barait
3. Parai di amu notutu (padi yang belum diproses menjadi beras)
4. Tosung
5. To-olu
6. Siud
7. Gagamas (parang yang digunakan untuk berkebun)
8. Gayang (parang panjang)
9. Lukug
10. Lamis (tali)
11. Rambot (rambat)
12. Tungkasip (perankap-biasa digunakan untuk menangkap tikus atau tupai)

Tuesday, May 3, 2011

Poundolihon Da'a Ie Kosolimbahan Boros Dusun

Tumimpuun do 1 April 2011, nokoundali noh di oh timpu kosolimbahan boros Dusun mantad 6.00-9.00 kosuabon kumaa doid jam 9.00-12.00 tangatuong.

Poposogu oku da'a do kumaa doid Sabah VFM do popundali di kosolimbahan boros Dusun do mantad 9.00 totuong gisom 12.00 tangatuong do kumaa doid timpu do kosuabon toi sodopon. Osonong daa oh timpu do kosuabon tu iri no kogumuan haro kosiwatan do tulun Dusun do mokinongou lolobi noh ie tulun mongoi pongindapu. Sodopon nga osonong nogi tu koulian nogi mantad mongidapu om tanganak sikul nga nongkouli noh. Totuong nopo nga kogumuan momili do mintong TV toi ko mokinongou do radio.

Osonong nogi da'a do poundolihon ei kosolimbahan boros English kumaa id totuong tu okon ko boros sandad do tulun Sabah. Kagu hom ogumu poh kosomlimbahan boros English di susuai.

Opurimana ku do kosolimbahan boros Dusun kaanu do popuawang do toilan ku do boros Dusun tu ogumu poh koroitan di amu ku oilaan. Om iti noh kosolimbahan kaanu do moki'ilo-ilo. Om id kosolimbahan diti korongou toko nogi di loyou kawawagu do Dusun om iti nga iso ralan do popointanga loyou Dusun.

Alasan oku da'a do haro kosokodungan do tulun Dusun id Sabah do koguli da'a ie kosolimbahan boros Dusun id timpu do tadau (mada oku di mimpuok-puok do totuong oi).

Friday, March 25, 2011

Boros do Melayu Ie Oubas Toko Boroson

Nung roiton nopo 'malas' nga kogumuan toko koilo oh nunu komoyon diri. Nung roiton toko nopo 'gobulan' ka, haro ie doti ie sukodwagu momusorou poh. Nunu mah dii oh suang talun iri ka doti.
Koubasanan no do tulun do mamarait di boros do koubasanan dau do gunoon id walai toi ie norongou mantad di tokoro poh. Iri noh pogi dot alalarom poh ie komolohingan do moboros do Dusun nga alalaid no momusorou do popoguli do tuhot.
Boros miagal 'bantal', 'galas', 'malas', 'wongi', 'cemburu', 'belajar', 'tali' om 'cerita' haro ie daa do boros do Dusun kopio nga amu boroson. Oubas nodi tolingo korongou di boros nung ie boros do Melayu oh boroson. Om ie tanganak ngaie nga oubas di do momoguno di boros di tu iri no norongou dau mantad di tokoro poh.
Umbalan toko daa do sumonu do momisunud di tanganak toko do boros do Dusun di noundalihan/nodalinan do boros do Melayu.

Thursday, August 19, 2010

Boros Do Tulun Cina om India

Id Malaysia ogumu tulun Cina om India. Haro Cina Hakka, Hokkien, Teochiew om nogi haro tulun do Pujanbi, Tamil om Singh (ogumu poh do tinaru do Cina om India ti nga poulaiyon nopo tokuri). Osorou ku, kogumuan diolo koilo do moboros do boros tinaru diolo sondiri.

Iti doho kokitanan nukuro tu kogumuan tulun Cina om India koilo do moboros diolo sondiri.
1. Barasan om unsubon do molohing id walai
2. Haro sikul diolo sondiri (SRJK Cina om Tamil)
3. Miboros yolo boros sondiri soira kopiruba toi id karamaian
4. Ogumu 'news' id boros do Cina om Tamil (Nanyang Sian Paw, Sin Chiew Daily, Overseas Chinese Daily News, See Hua Daily News, Malaysia Nanban, Makkal Osai, Tamil Nesan)
5. Ondos yolo do boros diolo

Pongkuro tokou dati sondiri? Aiso sikul do Dusun. Newspaper nga ingga, haro daa nga duo tolu noh 'mukasurat'. Soira haro karamaian, asanangan nogo momoguno do boros Melayu toi Inggilish.